Viðskiptaferðir.is - Heimurinn bíður eftir þér

Lausn við myndagátu 15

Kremlin
Originally uploaded by mieszko.stanislawski

Myndina tók Mieszko Stanislawsky í Kreml í Moskvu. Samkvæmt klukkunni á turninum í bakgrunni er klukkan 10 mínútur yfir 12 að staðartíma í Moskvu. Miðað við klæðaburðinn erum við að tala um sumartíma og þá er tímamismunurinn á Íslandi og Moskvu fjórir tímar. Klukkan er því 10 mínútur yfir átta á Íslandi þegar myndir er tekin.

Hjörtur

Lausn við myndagátu 13

Berlin Alexander Platz
Originally uploaded by Werner Kunz (werkunz1)

Speglunin gefur engar vísbendingar um hvaðan myndin er en gefur henni hins vegar skemmtilegan blæ. Helsta kennileitið á myndinni er sjónvarpsturninn sem er ansi þekktur en annars er myndin frá aðaltorginu í austurhluta borgarinnar. Sporvagnarnir gefa líka ákveðna vísbendingu.

Borgin er að sjálfsögðu Berlín og er myndin frá Alexander Platz. Vinstra megin má sjá sjónvarpsturninn sem gnæfir yfir borginni og hægra megin er Park Hotel.

Berlín er mjög skemmtileg borg heim að sækja með litskrúðugt mannlíf og mikla sögu. Berlín er í hringamiðju sögu 20 aldarinnar með stofnun lýðveldis eftir fyrri heimstyrjöldina, valdaskeiði Nazizta og seinni heimsstyrjöldina og að sjálfsögðu þekktasta víglína kalda stríðsins, Berlínarmúrinn, sleit í sundur borgina í tæp 40 ár. Þetta er borg sem ég get mælt með.

Nokkrir voru með rétt svör við þessari gátu en vinninginn að þessu sinni, mat á veitingastaðnum Eldhrímni, hlaut Gunnar Hólmsteinn og óska ég honum til hamingju með hann.

Ef þú ert að hugsa um að heimsækja Berlín, þá fljúga bæði Iceland Express og Icelandair til Berlínar. Þú finnur líka frábær tilboð á hótel í Berlín hér hér eða þú getur skoðað Hostel á Hostelworld hér vinstra megin en þau eru allt niður í 20 dollara nóttin.

Hjörtur

ps. munið að gerast fans á facebook eða áskrifendur á twitter til að fá tilboð, verðlaunagátur og áhugaverðar ferðasögur :)

Lausn við myndagátu 12

seattle-skyline-4
Originally uploaded by RudyLopez

Myndin í myndagátu númer 12 skartar mjög þekktum kennileitum fyrir borgina, annars vegar er það geim nálin (Space Needle) sem byggð var fyrir heimssýninguna 1962, og hins vegar "bæjarfjallið" Mt. Rainier, eldfjall sem stendur 87 km suðaustur af borginni.

Borgin er Seattle í Washington fylki á vesturströnd Bandaríkjanna og er myndin tekin úr Kerry Park og er þetta eitt þekktasta sjónarhornið á borgina. Það má til gamans geta þess að teikningin í hausnum á vidskiptaferdir.is er einmitt frá Seattle.

Þó nokkrir voru með rétt svar og þekktu borgina. Dregið var úr réttum svörum og vinningshafinn að þessu sinni var Bjarni Magnússon og hlýtur hann mat fyrir tvo á veitingastaðnum Eldhrímni að launum. Óskum við honum til hamingju með vinninginn.

Myndina tók ljósmyndarinn Rudy Lopez en Rudy á margar flottar myndir frá Seattle inn á Flickr.

Icelandair er farið að fljúga til Seattle og borgin því spennandi áfangastaður fyrir Íslendinga. Vinsælasta hótelið í Seattle samkvæmt TripAdvisor er Hotel 1000 en einnig eru Hyatt At Olive 8, Four Seasons Seattle og Grand Hyatt Seattle (sem er oft á mjög góðu verði) að fá framúrskarandi góða dóma. Af ódýrari hótelum í Seattle sem þykja mjög góð má nefna Hotel Vintage Park og Holiday Inn Seattle.

Hjörtur

ps. munið að gerast fans á facebook eða áskrifendur á twitter til að fá tilboð, verðlaunagátur og áhugaverðar ferðasögur :)

Lausn við myndagátu 10

Red dunes, Sossusvlei
Originally uploaded by jhen6550

Myndin í myndagátu 10 er af frægustu rauðu sandöldunni í Namibíu sem er nánast skyldumæting á ef farið er til Namibíu. Hún er í Sossusvlei, norður af Swakopmund, vinsælum sumarleyfis- og strandstað og er yfirleitt bara kölluð Alda 45 (Dune 45) en nafnið er dregið af því að aldan er 45 kílómetra frá Sesriem gljúfrinu.

Aldan stendur 170 metra upp úr umhverfinu og er úr 5 milljón ára gömlum sandi sem Appelsínu áin (Orange River) hefur sorfið úr berginu og vindurinn blásið upp.

Fegurð svæðisins og litirnir þykja njóta sín best við sólarupprás. Myndin er af Flickr og er tekin af jhen6550. Einungis tveir voru með rétt svar við þessari gátu og er vinningshafinn að þessu sinni Guðmundur Gunnlaugsson og fær hann mat fyrir tvo á veitingastaðnum Eldhrímni.

Hjörtur

ps. munið að gerast fans á facebook eða áskrifendur á twitter til að fá tilboð, verðlaunagátur og áhugaverðar ferðasögur :)

Lausn við myndagátu 9

Flestir virtust strax átta sig á borginni, og margir á byggingunni. Þó öll skiltin væru með kínversku letri var það ekki að þvælast fyrir fólki. Myndin er tekin í Kínahverfinu í New York og skýjakljúfurinn sem sést í baksýn er Chrysler byggingin. Vinningshafinn fyrir rétt svar um borg og byggingu er Storm Karlsson, sem svaraði á Facebook.

Nákvæm staðsetning þvældist hins vegar meira fyrir fólki og var aðeins einn með hana rétta. Myndina tók undirritaður og er hún tekin á gatnamótum Eldridge St. og Division St. Einföld leið til að finna það út hefði verið t.d. að fletta upp einhverju af símanúmerunum sem eru á skiltunum. Sá sem var með þetta á hreinu var @urbanmania eða Jóhannes Erlingsson og fær hann mat fyrir tvo á Eldhrímni. 

Hjörtur

ps. munið að gerast fans á facebook eða áskrifendur á twitter

Lausn við myndagátu 8

Myndin í síðustu myndagátu reyndist mönnum erfið, enda lítið um kennileiti. En vel er að gáð má sjá að á turninum sem gnæfir yfir gröfunum er ólympíumerkið. Þetta svæði var ekki útbúið sem grafreitur. Þetta er ólympíuleikvangurinn í Sarajevo í Bosníu. Leikvangurinn var aðsetur vetrarólympíuleikanna 1984. 

Í Júgóslavíu stríðinu umkringdi serbneski herinn borgina. Úr hæðunum í kring gerði herinn árásir með stórskotaliði, skriðdrekum, leyniskyttum og öðrum vopnum. Umsátrið er það lengsta í seinni tíma og stóð frá 5. apríl 1992 til 29. febrúar 1996. 10.000 manns voru myrtir, þar af 1.500 börn. 56.000 manns voru særðir, þar af 15.000 börn. Enginn var óhultur fyrir árásum Serbneska hersins, hvorki heima, í skólum né á sjúkrahúsum. Kirkjugarðar inn í borginni urðu fljótt yfirfulllir og því var gripið til þess ráðs að grafa hina látnu á ólympíu leikvanginum. Það er gríðarlega áhrifamikið að labba um leikvanginn með olympíu merkið, sameiningartáknið, á turninum en um allt eru grafir. Flestar þeirra eru frá árinu 1993 og nánast allir hinna látnu eru ungt fólk, tvítugt, þrítugt og börn og unglingar. Og þetta er ekki eitthvað sem gerðist á miðöldum, þetta eru atburðir sem gerðust hér í Evrópu fyrir aðeins örfáum árum. Sjálfur var ég á hinum stríðshrjáðu svæðum aðeins mánuði seinna, en þó ekki í Sarajevo.

 

Myndina tók ég árið 2004, 8 árum eftir stríð. Þá var borgin enn í rúst með hálfbrunnin og hálfhrunin hús á hverju horni. Það var sorglegt að sjá sömu þorpin eftir átta ár, þar sem ekkert hafði breyst. Brunnin bílflök enn á sama stað, sömu rifnu gluggatjöldin enn blaktandi út úm brotnar rúður. Stríðið er ekki búið þó að stríðinu sé hætt.

Vinningshafinn í myndagátunni að þessu sinni svaraði henni á twitter en það var Eiríkur Jónsson. Hann fær mat fyrir tvo á veitingastaðnum Eldhrímni í Borgartúni og óska ég honum til hamingju með það.

Hjörtur

ps. munið að gerast fans á Facebook til að fylgjast með nýjum gátum og uppfærslum.

Lausn myndagátu númer 7

Margar tillögur að réttu svari komu við síðustu myndagátu en einungis eitt svar var alveg rétt. Það sem vafðist fyrir flestum var ekki byggingin sem sést á myndinni, heldur byggingin sem ekki sést á myndinni, það er byggingin sem ljósmyndarinn er staddur í.

Myndina tók undirritaður og er hún af þinghúsinu í Búdapest í Ungverjalandi og er tekin í gegnum kýrauga á byggingu sem er upp á hæðinni hinum megin við Dóná og er kölluð "The Fisherman's Bastion" eða Fiskimannavirkið. Virkið dregur nafn sitt af herdeild fiskimanna sem hafði það hlutverk að gæta virkisins á miðöldum.

Við óskum vinningshafanum til hamingju með verðlaunin og glöggt auga, en hún hlýtur út að borða fyrir tvo á veitingastaðnum Eldhrímni í verðlaun.

Hjörtur

ps. munið að gerast fans á Facebook til að fá alltaf nýjustu myndagáturnar ásamt skemmtilegum greinum og tilboðum.

Lausn við myndagátu 6 - Aral vatn

Aral "sea" near Vozrozhdenie island
Originally uploaded by israel_is.live

Myndin í myndagátu 6 sýnir eitt skelfilegasta umhverfisslysi allra tíma, uppþornun Aral vatns. Myndin er tekin við Vozrozhdenie eyju í Uzbekistan en vatnið er á landamærum Uzbekistan og Kazakstan.

Aral vatn var fjórða stærsta stöðuvatn í heimi en árið 1960 ákvað kommúnistastjórnin að hefja umfangsmikla ræktun á grjónum, korni og bómull í Kazakstan og Uzbekistan. Til þess var farið í gríðarlega umfangsmiklar veitu framkvæmdir þar sem vatni úr ánum Amu Darya og Syr Darya var veitt á akrana. Það hafði hins vegar þær afleiðingar að vatnsyfirboðið í Aral vatni tók að lækka hratt og í dag hefur flatarmál vatnsins minnkað um 60% og vatnsmagnið um tæp 80%. Vatnið er í þremur hlutum núna og er nánast allt líf dautt í tveimur þeirra vegna of mikils saltmagns og samansöfnunar á mengunarvöldum eins og áburðar, skordýraeiturs og úrgangs frá vopnatilraunum.

Fiskveiðibæir í Uzbekistan sem lágu við vatnið eru nú í allt að 150 km fjarlægð frá vatninu og eftir er ekkert gapandi skipsskrokkar sem ryðga í eyðimörkinni. Undirstöðu efnahagslífs hefur verið kippt undan bæjarbúum með tilheyrandi eymd, fátækt og sjúkdómum.

Í "litla Aral vatni" sem er í Kazakstan hefur verið ráðist í ýmsar framkvæmdir til að bjarga vatninu og hefur tekist að hækka yfirborðið aftur um 2 metra og nú er aftur hægt að veiða fisk í vatninu.

Myndin er fengin af flickr og er tekin af ljósmyndara sem kallar sig israel_is.live.

Nánari upplýsingar um Aral vatn

Að þessu sinni drógum við út einn vinningshafa sem kom með rétt svar og fær sá mat fyrir tvo á veitingastaðnum Eldhrímni á Höfðatorgi. Vinningshafi í myndagátunni er Guðrún Benediktsdóttir. Við óskum henni innilega til hamingju og þökkum öllum fyrir þátttökuna.

Hjörtur

ps. munið að gerast fans á Facebook til að fylgjast með myndagátunni, ferðagreinum og ómótstæðilegum tilboðum :)

Lausn við myndagátu 5

Samarkand
Originally uploaded by M.Bob

Myndin í myndagátu 5 kemur langt að, alla leiðina frá "Fjarskanistan". Þetta er Registan í hinni sögufrægu borg Samarkand í Uzbekistan. Samarkand er ekki borg sem margir ferðamenn leggja leið sína til í dag, en var eitt sinn í alfaraleið og hefur verið mikil verslunar og menningarborg.

Registan eru miðja hinnar fornu borgar. Borgin sjálf var stofnuð fyrir 2.750 árum síðan og hefur verið miðstöð ýmissa velda og trúarlega mikilvæg fyrir bæði búddisma og islam. Borgarinnar er getið í 1001 nótt og ýmsum skáldsögum og var frægur áfangastaður á silkileiðinni, en þarna hafa í gegnum tíðina mæst kínverskir og islamskir straumar.

Það er ólíklegt að Samarkand verði á skiltunum í Leifstöð í framtíðinni en gæti verið áhugaverður áfangastaður fyrir ævintýragjarna ferðalanga.

Myndina tók M.Bob og er hægt að skoða hana betur á Flickr. Meira er hægt að lesa um Samarkand á Wikipedia.

Hjörtur

Lausn við myndagátu 4

Myndin sem spurt var um í myndagátu 4 síðastliðinn mánudag er frá byggingu sem heitir Plaza de España og er í Sevilla á Spáni. Byggingin var reist árið 1929 fyrir stóra sýningu sem haldin var í borginni það árið. Byggingin liggur í hálfhring og hægt er að sigla meðfram henni og virða fyrir sér mósaík myndir sem gerðar hafa verið, ein fyrir hvert hérað á Spáni. Einnig er hægt að fara í asnakerrureið á torginu eins og sjá má. Að mínu mati er þetta einn fallegasti staður sem ég hef komið á og í miklu uppáhaldi.

Og sem svar við aukaspurningunni, þá birtist byggingin í Star Wars Episode II: The Attack of the Clones. Reyndar er byggingunni breytt aðeins í tölvu, en er þó auðþekkjanleg. Myndina tók undirritaður.

Hjörtur