Viðskiptaferðir.is - Heimurinn bíður eftir þér

Ökuferð í arabísku eyðimörkinni

Johnny Jet fór í ökuferð á dögunum í The Empty Box, gróðursnauðri eyðimörk í Sameinuðu arabísku furstadæmunum. Þar er að finna allt að 300 metra háar sandöldur sem býður óneitanlega upp á skemmtilegan sandakstur. Hér er myndbandið úr ferðinni: 

 

Arctic Trucks gæti nú eflaust gert bílinn þeirra aðeins skemmtilegri ;)

Hjörtur

Segulmagnað fjall sem sigrast á þyngdarlögmálinu

 Í Ladakh í Himalayafjöllum er að finna Segulfjallið, fjall sem sigrast á þyngdarlögmálinu. Krafturinn er svo mikill að bílar færast upp brekkuna þrátt fyrir að vera ekki í gangi og geta náð allt að 20 km/klst. Einnig er sagt að togkraftur fjallsins finnist þegar flogið er yfir og er fljúgandi farartækjum ráðlagt að halda ákveðinni hæð og hraða til að lenda ekki í vandræðum. 

 

Ef þú vilt prófa að upplifa áhrif fjallsins, þá er það staðsett um 30 km frá Leh, á Leh-Kargil-Baltik þjóðveginum í um 4.600 metra hæð. Fjallið er orðið vinsæll áfangastaður í dag en skammt frá fjallinu er helgur staður þar sem indverski gúrúinn Nanak Dev, upphafsmaður Shikisma, hugleiddi á 17. öld.

Skammt frá er annar merkur vegur, hæsti fjallvegur í heimi sem er í yfir 6.000 metra hæð. Hér borgar sig að fara í engu óðslega eða fólk á á hættu að fá háfjallaveiki.

Hér má sjá myndband af bifreið sem togast upp brekkuna í átt að Segulfjallinu:

Hjörtur
(via zuzutop)

ps. munið að gerast fans á facebook eða áskrifendur á twitter til að fá tilboð, verðlaunagátur og áhugaverðar ferðasögur :)

Lausn við myndagátu 13

Berlin Alexander Platz
Originally uploaded by Werner Kunz (werkunz1)

Speglunin gefur engar vísbendingar um hvaðan myndin er en gefur henni hins vegar skemmtilegan blæ. Helsta kennileitið á myndinni er sjónvarpsturninn sem er ansi þekktur en annars er myndin frá aðaltorginu í austurhluta borgarinnar. Sporvagnarnir gefa líka ákveðna vísbendingu.

Borgin er að sjálfsögðu Berlín og er myndin frá Alexander Platz. Vinstra megin má sjá sjónvarpsturninn sem gnæfir yfir borginni og hægra megin er Park Hotel.

Berlín er mjög skemmtileg borg heim að sækja með litskrúðugt mannlíf og mikla sögu. Berlín er í hringamiðju sögu 20 aldarinnar með stofnun lýðveldis eftir fyrri heimstyrjöldina, valdaskeiði Nazizta og seinni heimsstyrjöldina og að sjálfsögðu þekktasta víglína kalda stríðsins, Berlínarmúrinn, sleit í sundur borgina í tæp 40 ár. Þetta er borg sem ég get mælt með.

Nokkrir voru með rétt svör við þessari gátu en vinninginn að þessu sinni, mat á veitingastaðnum Eldhrímni, hlaut Gunnar Hólmsteinn og óska ég honum til hamingju með hann.

Ef þú ert að hugsa um að heimsækja Berlín, þá fljúga bæði Iceland Express og Icelandair til Berlínar. Þú finnur líka frábær tilboð á hótel í Berlín hér hér eða þú getur skoðað Hostel á Hostelworld hér vinstra megin en þau eru allt niður í 20 dollara nóttin.

Hjörtur

ps. munið að gerast fans á facebook eða áskrifendur á twitter til að fá tilboð, verðlaunagátur og áhugaverðar ferðasögur :)

Semana Santa í Sevilla á Spáni

Þetta er það sem þú getur átt von á að sjá ef þú ferð til Andalúsíu á Spáni vikuna fyrir Páska. Semana Santa, eða vikan helga, er nokkurra daga helgi hátíð þar sem kirkjur í borgum og bæjum Andalúsíu standa fyrir skrúðgöngum. Það sem gerir þessar skrúðgöngur all sérkennilegar og kannski óhuggulegar í hugum sumra eru búningarnir sem menn klæðast í göngunum, en á þeim eru háar hettur líkt og Ku Klux Klan klæddist í Bandaríkjunum. Þessar göngur eiga hins vegar ekkert skylt við Ku Klux Klan heldur eru þetta trúarleg klæði sem notuð hafa verið í hundruðir ára. Í göngunum er gengið á milli kirkna með líkneski af kaþólskum dýrlingum, Jesú Kristi og Maríu Mey. Þessar göngur eru orðin mikil ferðamannahátíð og er Semana Santa mesta ferðavikan í Sevilla og nágrenni.

Hægt er að skoða fleiri myndir hér auk þess sem þar eru upplýsingar um gistingu og ferðaþjónustu í Sevilla.

Hjörtur

ps. munið að gerast fans á facebook eða áskrifendur á twitter til að fá tilboð, verðlaunagátur og áhugaverðar ferðasögur :)

Lausn við myndagátu 12

seattle-skyline-4
Originally uploaded by RudyLopez

Myndin í myndagátu númer 12 skartar mjög þekktum kennileitum fyrir borgina, annars vegar er það geim nálin (Space Needle) sem byggð var fyrir heimssýninguna 1962, og hins vegar "bæjarfjallið" Mt. Rainier, eldfjall sem stendur 87 km suðaustur af borginni.

Borgin er Seattle í Washington fylki á vesturströnd Bandaríkjanna og er myndin tekin úr Kerry Park og er þetta eitt þekktasta sjónarhornið á borgina. Það má til gamans geta þess að teikningin í hausnum á vidskiptaferdir.is er einmitt frá Seattle.

Þó nokkrir voru með rétt svar og þekktu borgina. Dregið var úr réttum svörum og vinningshafinn að þessu sinni var Bjarni Magnússon og hlýtur hann mat fyrir tvo á veitingastaðnum Eldhrímni að launum. Óskum við honum til hamingju með vinninginn.

Myndina tók ljósmyndarinn Rudy Lopez en Rudy á margar flottar myndir frá Seattle inn á Flickr.

Icelandair er farið að fljúga til Seattle og borgin því spennandi áfangastaður fyrir Íslendinga. Vinsælasta hótelið í Seattle samkvæmt TripAdvisor er Hotel 1000 en einnig eru Hyatt At Olive 8, Four Seasons Seattle og Grand Hyatt Seattle (sem er oft á mjög góðu verði) að fá framúrskarandi góða dóma. Af ódýrari hótelum í Seattle sem þykja mjög góð má nefna Hotel Vintage Park og Holiday Inn Seattle.

Hjörtur

ps. munið að gerast fans á facebook eða áskrifendur á twitter til að fá tilboð, verðlaunagátur og áhugaverðar ferðasögur :)

8 bestu strendur Evrópu

Þessi póstur er frá Nellie Huang, ferðabloggara sem segir frá ævintýraferðum sínum um heiminn á Wild Junket ferðablogginu. Hún tók saman 8 bestu strendur Evrópu að sínu mati og þær koma hér:

1. Navagio Beach – Zakynthos, Grikklandi
Einnig þekkt sem Shipwreck Bay eða Skipbrotsflói þá er þessi vogur kennimark eyjarinnar og einn sá þekktasti í Grikklandi. Gríðarstórir klettar umlykja hvíta sanda og skapa þessa paradísarstemningu. Það er einungis hægt að komast þangað á bát en siglt er frá Porto Vromi. Grikklandi er einn af vinsælustu sumarleyfisstöðum Evrópu þannig að best er að fara í apríl eða september. 

2. Playa Papagayo – Lanzarote, Spáni
Náttúrulegur samhljómur hinnar afskekktu víkur og hinnar ósnortnu strandar er eitthvað sem erfitt er að nálgast nema með því að þræða lélega vegarslóða eða ganga - sem er líklega ástæðan fyrir því að það hefur haldið sínum einstöku eiginleikum. Kristaltær sjórinn og óteljandi gönguleiðir eftir bjargbrúnunum gera þessa kyrrlátu strönd eina þá bestu í Lanzarote og í landinu öllu.

3. Zlatni Rat – Brač, Króatíu
Þessi V-laga gyllta steinaströnd er ein sú magnaðasta við Adríahafið. Zlatni Rat, sem þýðir Gyllta Hornið, er einstakt landfræðilegt fyrirbæri. Ströndin breytir lögun og legu eftir vindinum, ótrúlegt fyrirbæri sem enginn má láta fram hjá sér fara. Við ströndina er furulundur og í honum er að finna rústir fornrar rómverskrar villu með sundlaug. 

4. Cala Tarida – Ibiza, Spáni
Gleymdu partýliðinu. Á Ibiza finnast sumar af náttúrulegustu og fallegustu ströndum Evrópu, vel geymdar á bakvið sandsteinskletta. Það er fjöldi af skemmtilegum klettum sem hægt er að synda út í til að njóta þess að baða sig í sólskininu í friði eða fyrir þá sem hugaðri eru, til að spreyta sig á klettadýfingum. Þær geta þó verið hættulegar. Ibiza er frábær áfangastaður fyrir einhleypa með fjörugt og litskrúðugt næturlíf og ótal tækifærum til að kynnast nýju fólki.

5.  Sagres – Algarve, Portúgal
Þessi hluti Portúgal teygir sig fleiri, fleiri kílómetra með mikilfenglegu landslagi, bröttum klettum, sandsteinsdröngum og vatnslituðum sjó. Á vestri endanum gnæfir hvítt virki yfir ósnertum ströndum, klettóttu landslagi og laðar að brimbrettagæja hvaðanæva að úr heiminum. Þetta er minn uppáhaldsstaður á Portúgal.

6. Las Islas Cies – Galicia, Spáni
Guardian valdi þessa sem eina bestu strönd í heimi með hvíta sandströndina eins pollrólega og kyrrláta tjörn. Hin fagra villa eya Islas Cies er verndarsvæði og þjóðgarður þar sem fjöldi ferðamanna sem fá að heimsækja eynna er takmarkaður. Eina gistingin sem er í boði er tjaldgisting sem lágmarkar áhrif mannfólksins á eynna. Þetta er ein af mínum uppáhalds.

 

7.  Patara – Turquoise Coast, Tyrklandi
Öldur, öldur og aftur öldur. Og þá á ég við sandöldur. Þessi einstaka strönd stendur við hinar miklu gylltu sandöldur og Taurus fjöllin. Vegna strangrar verndarstefnu eru engar byggingar neins staðar í kring þannig að strönd er enn ósnortin. Ströndin er ein af örfáum ströndum heims þar sem Loggerhead skjaldbökurnar koma enn til að leggja egg sín á tímabilinu frá Maí til Október. Allt umhverfið gerir þessa strönd að frábærum stað fyrir ævintýraferðir.

8. Spiaggia Sabbie Nere – Sikiley, Ítalíu
Eldfjallaströnd ólík öllum öðrum, þá er strönd hinna svörtu sanda sú besta á Aeolian skaganum. Með svörtum grófum eldfjallasandi verður Spiaggia Sabbie Nere einstök strandarupplifun og eitthvað til að segja fólkinu heima frá. Hún er við Porto di Ponente, á hinum enda eyjarinnar - rólegum, kyrrlátum stað þar sem hægt er að slappa algjörlega af. 

Nellie Huang
(8 of the best beaches in Europe)

ps. munið að gerast fans á facebook eða áskrifendur á twitter til að fá tilboð, verðlaunagátur og áhugaverðar ferðasögur :)

Lausn við myndagátu 10

Red dunes, Sossusvlei
Originally uploaded by jhen6550

Myndin í myndagátu 10 er af frægustu rauðu sandöldunni í Namibíu sem er nánast skyldumæting á ef farið er til Namibíu. Hún er í Sossusvlei, norður af Swakopmund, vinsælum sumarleyfis- og strandstað og er yfirleitt bara kölluð Alda 45 (Dune 45) en nafnið er dregið af því að aldan er 45 kílómetra frá Sesriem gljúfrinu.

Aldan stendur 170 metra upp úr umhverfinu og er úr 5 milljón ára gömlum sandi sem Appelsínu áin (Orange River) hefur sorfið úr berginu og vindurinn blásið upp.

Fegurð svæðisins og litirnir þykja njóta sín best við sólarupprás. Myndin er af Flickr og er tekin af jhen6550. Einungis tveir voru með rétt svar við þessari gátu og er vinningshafinn að þessu sinni Guðmundur Gunnlaugsson og fær hann mat fyrir tvo á veitingastaðnum Eldhrímni.

Hjörtur

ps. munið að gerast fans á facebook eða áskrifendur á twitter til að fá tilboð, verðlaunagátur og áhugaverðar ferðasögur :)

Lausn við myndagátu 9

Flestir virtust strax átta sig á borginni, og margir á byggingunni. Þó öll skiltin væru með kínversku letri var það ekki að þvælast fyrir fólki. Myndin er tekin í Kínahverfinu í New York og skýjakljúfurinn sem sést í baksýn er Chrysler byggingin. Vinningshafinn fyrir rétt svar um borg og byggingu er Storm Karlsson, sem svaraði á Facebook.

Nákvæm staðsetning þvældist hins vegar meira fyrir fólki og var aðeins einn með hana rétta. Myndina tók undirritaður og er hún tekin á gatnamótum Eldridge St. og Division St. Einföld leið til að finna það út hefði verið t.d. að fletta upp einhverju af símanúmerunum sem eru á skiltunum. Sá sem var með þetta á hreinu var @urbanmania eða Jóhannes Erlingsson og fær hann mat fyrir tvo á Eldhrímni. 

Hjörtur

ps. munið að gerast fans á facebook eða áskrifendur á twitter

Lausn við myndagátu 8

Myndin í síðustu myndagátu reyndist mönnum erfið, enda lítið um kennileiti. En vel er að gáð má sjá að á turninum sem gnæfir yfir gröfunum er ólympíumerkið. Þetta svæði var ekki útbúið sem grafreitur. Þetta er ólympíuleikvangurinn í Sarajevo í Bosníu. Leikvangurinn var aðsetur vetrarólympíuleikanna 1984. 

Í Júgóslavíu stríðinu umkringdi serbneski herinn borgina. Úr hæðunum í kring gerði herinn árásir með stórskotaliði, skriðdrekum, leyniskyttum og öðrum vopnum. Umsátrið er það lengsta í seinni tíma og stóð frá 5. apríl 1992 til 29. febrúar 1996. 10.000 manns voru myrtir, þar af 1.500 börn. 56.000 manns voru særðir, þar af 15.000 börn. Enginn var óhultur fyrir árásum Serbneska hersins, hvorki heima, í skólum né á sjúkrahúsum. Kirkjugarðar inn í borginni urðu fljótt yfirfulllir og því var gripið til þess ráðs að grafa hina látnu á ólympíu leikvanginum. Það er gríðarlega áhrifamikið að labba um leikvanginn með olympíu merkið, sameiningartáknið, á turninum en um allt eru grafir. Flestar þeirra eru frá árinu 1993 og nánast allir hinna látnu eru ungt fólk, tvítugt, þrítugt og börn og unglingar. Og þetta er ekki eitthvað sem gerðist á miðöldum, þetta eru atburðir sem gerðust hér í Evrópu fyrir aðeins örfáum árum. Sjálfur var ég á hinum stríðshrjáðu svæðum aðeins mánuði seinna, en þó ekki í Sarajevo.

 

Myndina tók ég árið 2004, 8 árum eftir stríð. Þá var borgin enn í rúst með hálfbrunnin og hálfhrunin hús á hverju horni. Það var sorglegt að sjá sömu þorpin eftir átta ár, þar sem ekkert hafði breyst. Brunnin bílflök enn á sama stað, sömu rifnu gluggatjöldin enn blaktandi út úm brotnar rúður. Stríðið er ekki búið þó að stríðinu sé hætt.

Vinningshafinn í myndagátunni að þessu sinni svaraði henni á twitter en það var Eiríkur Jónsson. Hann fær mat fyrir tvo á veitingastaðnum Eldhrímni í Borgartúni og óska ég honum til hamingju með það.

Hjörtur

ps. munið að gerast fans á Facebook til að fylgjast með nýjum gátum og uppfærslum.

Lausn við myndagátu 6 - Aral vatn

Aral "sea" near Vozrozhdenie island
Originally uploaded by israel_is.live

Myndin í myndagátu 6 sýnir eitt skelfilegasta umhverfisslysi allra tíma, uppþornun Aral vatns. Myndin er tekin við Vozrozhdenie eyju í Uzbekistan en vatnið er á landamærum Uzbekistan og Kazakstan.

Aral vatn var fjórða stærsta stöðuvatn í heimi en árið 1960 ákvað kommúnistastjórnin að hefja umfangsmikla ræktun á grjónum, korni og bómull í Kazakstan og Uzbekistan. Til þess var farið í gríðarlega umfangsmiklar veitu framkvæmdir þar sem vatni úr ánum Amu Darya og Syr Darya var veitt á akrana. Það hafði hins vegar þær afleiðingar að vatnsyfirboðið í Aral vatni tók að lækka hratt og í dag hefur flatarmál vatnsins minnkað um 60% og vatnsmagnið um tæp 80%. Vatnið er í þremur hlutum núna og er nánast allt líf dautt í tveimur þeirra vegna of mikils saltmagns og samansöfnunar á mengunarvöldum eins og áburðar, skordýraeiturs og úrgangs frá vopnatilraunum.

Fiskveiðibæir í Uzbekistan sem lágu við vatnið eru nú í allt að 150 km fjarlægð frá vatninu og eftir er ekkert gapandi skipsskrokkar sem ryðga í eyðimörkinni. Undirstöðu efnahagslífs hefur verið kippt undan bæjarbúum með tilheyrandi eymd, fátækt og sjúkdómum.

Í "litla Aral vatni" sem er í Kazakstan hefur verið ráðist í ýmsar framkvæmdir til að bjarga vatninu og hefur tekist að hækka yfirborðið aftur um 2 metra og nú er aftur hægt að veiða fisk í vatninu.

Myndin er fengin af flickr og er tekin af ljósmyndara sem kallar sig israel_is.live.

Nánari upplýsingar um Aral vatn

Að þessu sinni drógum við út einn vinningshafa sem kom með rétt svar og fær sá mat fyrir tvo á veitingastaðnum Eldhrímni á Höfðatorgi. Vinningshafi í myndagátunni er Guðrún Benediktsdóttir. Við óskum henni innilega til hamingju og þökkum öllum fyrir þátttökuna.

Hjörtur

ps. munið að gerast fans á Facebook til að fylgjast með myndagátunni, ferðagreinum og ómótstæðilegum tilboðum :)